KWA HABARI YA ZINAA (SEHEMU YA NNE)

MWANDISHI: Anderson Leng'oko

Utangulizi

Mpendwa mfuatiliaji wa somo hili, tunashukuru kuwa Mungu anaendelea kutujalia mafundisho mema kuhusu habari ya zinaa. Tunakushukuru wewe ambaye kwa namna moja ama nyingine umekuwa ukifuatilia somo hili na kuombea mwendelezo wake. Pia kwa msomaji mpya, bonyeza HAPA ili uweze kufuata mtiririko mzima wa somo hili na ujifunze kwa undani yale ambayo Mungu amekuwa akisema nasi katika sehemu tatu tulizopita. Leo tunaendelea na sababu zinazopelekea watu waanguke kwenye uasherati na uzinifu. Mambo haya yapo mengi lakini kwa namna moja ama nyingine kwa kuyasoma unapata mwanga wa namna ya kuepuka mambo hayo na ushauri unatolewa ili hata kama yupo rafiki yako au ndugu anayepitia hali hizo aweze kuziepuka. Endelea kubarikiwa…

Kanisa kuyakalia kimya mambo ya zinaa kana kwamba hayapo

Kanisa pia linatakiwa kuyawekea mkazo mambo haya na kuwaelekeza vijana kuhusu maana, athari na matatizo mbalimbali yanayoambatana na zinaa. Kama kanisa litakaa kimya juu ya athari zinazopatikana kwa kuzini hakika yake waumini wataendelea kukosea na kuona kuwa zinaa ni kitu cha kawaida.

Kama tunavyoelewa jamii nyingi za kiafrika haziongelei sana mambo ya zinaa, hivyo hatuna budi kama kanisa kuongeza bidii ya kuliongelea na kuwafundisha hasa watoto na vijana kuhusu mambo haya ili wawe na ufahamu na uwezo wa kupambanua mambo wanapokutana nayo. Kuna usemi wa kiingereza usemao ‘forewarned, forearmed,’ yaani ukionywa mapema, utajiandaa mapema.

Hosea 4:6 Watu wangu wanaangamizwa kwa kukosa maarifa; kwa kuwa wewe umeyakataa maarifa, mimi nami nitakukataa wewe, usiwe kuhani kwangu mimi; kwa kuwa umeisahau sheria ya Mungu wako, mimi nami nitawasahau watoto wako.

Mwingine ameshituka nilipotaja watoto, lakini uhalisia huko duniani ni kwamba kuna watoto wanapata mimba wakiwa darasa la tatu, nne na tano. Inaonesha kanisa ‘linaibiwa zamu,’ yaani shetani anatuwahi kabla hatujashituka. Rafiki yangu mmoja alishituka sana alipoona kupitia dirisha lake asubuhi moja watoto wakifanya mapenzi, wakati mwingine alikuwa na miaka miwili hivi, hawezi hata kuongea. Kama mtoto anajua kuhusu zinaa akiwa na miaka miwili au hajajua kuongea vizuri, vipi kanisa linaweza kukwepa kuzungumzia zinaa kwa watoto?

Proverbs 22:6

Mlee mtoto katika njia impasayo, Naye hataiacha, hata atakapokuwa mzee.

Kukosa kazi ya kufanya

Wapo watu ambao wanakula na kushinda kwenye tv, wanakula na kwenda vijiweni kukaa, watu hawa hujikuta wana muda mwingi wa kuwaza na kuona maovu. Matokeo yake hujiingiza kwenye tabia hatarishi, ikiwemo zinaa, ulevi n.k.

Sababu za kiuchumi

Wengine huzini kwa lengo la kujipatia fedha za kukidhi mahitaji ya kimaisha. Katika kundi hili huingia makahaba ambao huwa wanajiuza kibiashara, lakini pia wapo wake na waume za watu ambao wana tamaa za pesa na kutokuridhika.

Hila za adui

Wengine huzini kwa sababu za kishirikina na kichawi au kishetani, wanakuwa maajenti wa shetani wanaochochea ngono ili wamtawale mtu kishirikina na kumtumia kichawi kama sehemu ya maagano na wakuu wa giza. Wanawake washirikina hutumia ngono kuwanasa wanaume na kwa wale walio na ndoa huwafanya wawaache wake zao na kuwa nao wenyewe, wengine huwa hawavunji ndoa, bali wanamtawala yule mwanaume na kula pesa zake kiasi hata cha kumfanya yule mwanaume awe radhi kuishindisha familia yake njaa.

Ikumbukwe pia kuwa shetani hutumia ngono ili kumtawala mwanadamu katika vifungo mbalimbali vya kudumu. Katika kutimiza kusudi hili, shetani huchochea ngono kwa kila hali, ambapo wakati mwingine hutuma mapepo ambayo huvaa miili ya wanawake wazuri na kukaa kwenye kona za miji wakijiuza kama makahaba.

Hiki ni kiwango cha juu cha utendaji kazi wa nguvu za giza. Wahanga wa uchawi huu na hila hizi za giza mara nyingi hupoteza maisha yao, au kuingia katika vifungo vya kudumu.

Kurejesha hisani

Wengine wanazini kwa lengo la kurejesha hisani baada ya kufanyiwa wema, na wengine huzini kama sehemu ya rushwa ya kufanikisha jambo fulani analolitaka toka kwa yule anayezini naye.

Kufuata mkumbo

Wengine huzini kwa kufuata mkumbo wa marafiki wabaya wakiisha kuaminishwa kuwa kuzini ndiyo fasheni na ndiyo mtindo wa maisha kwa kila kijana, mara nyingi hawa huwa ni vijana na wasichana wadogo wanaojikuta wamezungukwa na makundi mabaya, au hata wanandoa wanaozungukwa na marafiki wabaya, ambao huwa wanawaambia kuwa figa moja haliivishi ugali.

Migogoro ya ndoa

Wengine huzini kwa lengo la kulipa kisasi katika ndoa au mahusiano; pale ambapo mwenzi wake anafanya usaliti, mtu huyu huamua na yeye kutoka nje ya ndoa au kumsaliti mwenziwe kama sehemu ya kisasi na kumkomesha mwenzake; hii inaweza kuwa ndani ya ndoa au kwenye mahusiano, na hata wengine hufikia hatua ya kutembea na wenzi wa wale waliotembea na wenzi wao, mfano, kama mwanamke akigundua kuwa rafiki yake wa kike anatembea na mumewe, mara nyingi naye huamua kutembea na mume wa yule rafiki yake ili kumkomesha rafiki yake. Hili siyo jambo la kulifanya hata kidogo.Mara nyingi watu wafanyao haya hawafuati misingi sahihi ya maisha. Kutembea nje ya ndoa ni tatizo ambalo haliigwi, kwani hupelekea mwanadamu kumuudhi Mungu na kuhatarisha maisha yake na umilele war oho yake.

Hivyo unapoona mwenzako anaenda nje ya ndoa tafadhali sana jaribu kutumia njia sahihi ya kukabiliana na tatizo na siyo kulipa kisasi kwa wewe pia kutoka nje ya ndoa. Kwa waombaji, tumia muda huu kumsihi Mungu kuhusu kuililia roho ya mwenzi wako huyu.

Kuna mtu mmoja aliwahi kusema mtu anayetoka nje ya ndoa kisa ameona mwenzake anatoka huyo naye tabia hiyo anayo tangu mwanzo. Ukitafakari kweli unaona inaleta mashiko makubwa sana. Kimsingi kama unafuata misingi ya utakatifu huwezi kuamua kuikosa mbingu na kuhatarisha uhai wako kwa kuwa mzinifu. Kwa kufanya hivyo unazidisha migogoro na kamwe hupati suluhu.

Kuna shuhuda nyingi ambazo tunakutana nazo kuhusu watu ambao wamekuwa waaminifu katika ndoa zao, lakini kwa bahati mbaya wenzi wao wamekuwa siyo waaminifu. Mwisho wa siku unakuta wale ambao walikuwa siyo waaminifu wanapata UKIMWI na hata kupoteza maisha wakiwaacha wenzao hawana hata huo UKIMWI.

Mungu ni mwaminifu sana, kamwe mzazi hatakula zabibu halafu mtoto ndio aumwe meno

Ezekiel 18:2-9

Je! Maana yake ni nini hata mkatumia mithali hii katika Israeli, mkisema, Baba wamekula zabibu mbichi, nao watoto wakatiwa ganzi la meno?

Kama mimi niishivyo, asema Bwana MUNGU, hamtakuwa na sababu ya kuitumia tena mithali hii katika Israeli.

Tazama, roho zote ni mali yangu; kama vile roho ya baba ni mali yangu, ndivyo ilivyo roho ya mwana mali yangu; roho ile itendayo dhambi itakufa.

Bali kama mtu ni mwenye haki, na kuyatenda yaliyo halali na haki;

hakula juu ya milima, wala hakuviinulia macho vinyago vya nyumba ya Israeli, wala hakumtia unajisi mke wa jirani yake, wala hakumkaribia mwanamke wakati wa kutengwa kwake;

wala hakumdhulumu mtu, bali amemrudishia mdeni wake rehani yake, wala hakumnyang'anya mtu mali yake kwa nguvu, naye amewapa wenye njaa chakula chake, na kuwavika nguo walio uchi;

ambaye hakumkopesha mtu ili apate faida, wala hakupokea ziada ya namna yo yote; naye ameuepusha mkono wake na uovu, na kufanya hukumu ya haki kati ya mtu na mwenzake;

tena ikiwa amezifuata sheria zangu, na kuzishika hukumu zangu; mtu huyu ni mwenye haki; hakika ataishi, asema Bwana MUNGU.

Hivyo tenda haki ili uishi, mtu asisababishe ukaangamia. Na uwe na uhakika kama ukitenda haki, mabaya yake hayatakupata kwani Mungu atakutetea.

Udadisi

Kuna watu walioingia kwenye zinaa kwa lengo la kuona jinsi ilivyo, kama kuna raha ni ipi, kama kuna faida ni ipi. Hao wanajikuta wanazini wakiwa na lengo la kudadisi kama kile walichokisikia ni kweli kuhusu zinaa au la.

Lakini Mungu hapendi mtu azini au afanye mapenzi yasiyo halali kwa sababu iwayo yoyote ile. Hivyo ni kazi ya shetani kusababisha watu wazini, siyo mpango wa Mungu mtu kuzini.

Usikose kuendelea na somo hili katika mambo yanayofuata, ambayo Mungu atatuwezesha kuyajadili katika sehemu zijazo. Tafadhali, hakikisha unalisambazaili wengine nao walione, walisome, wapate baraka ambazo umezipata. Ubarikiwe sana.