KWA HABARI YA ZINAA (SEHEMU YA TATU)

MWANDISHI: Anderson Leng'oko

Utangulizi

Mpendwa msomaji tunaendelea na sehemu ya tatu kwa neema ya Mungu. Bila shaka Mungu ana mengi bado ya kuongea na wewe kuhusu somo hili na kukufahamisha mambo mbalimbali au hata kukukumbusha na kukutia moyo katika habari za zinaa. Kama hujasoma sehemu mbili za kwanza zilizotangulia bonyeza HAPA ili kupata mtiririko mzuri zaidi wa somo hili. Katika sehemu hii ya tatu tunaendelea kujadili zile sababu zinazopelekea watu kuzini au kuwa wazinifu. Lengo hapa ni kuwafanya watu waelewe wapo wapi na ni mambo gani wayafanye wanapokutana na moja kati ya hali tunazozijadili hapa kwamba zinaweza kupelekea mtu kuzini au kuwa mzinifu. Mungu amekuwa mwaminifu katika kulipa uhai neno lake na nakusihi ulisome somo hili kwa kuomba na kutafakari kwa kina na usisahau kuwataarifu na wenzako wengine ili nao wapate maarifa haya. Ubarikiwe sana.

Tamaduni za kigeni

Tamaduni za kigeni zinajumuisha mambo mengi, tunapoiga mavazi, mienendo na tabia za kigeni tunakuta tunaambukizwa mifumo ya maisha ambayo kwetu haipo. Mavazi yana mchango mkubwa sana katika tabia chafu za zinaa. Haya yanawafanya watu wakumbuke zinaa na kuishikilia. Kwa mfano, mtu ukitaka kusahau jambo, inabidi jambo hilo lisiongelewe na wala mtu asikukumbushe kabisa. Vivyo hivyo ukitaka kusahau zinaa, inatakiwa mawazo yako yasikumbuke kabisa habari hizo. Lakini akipita mbele yako mtu aliyeacha maumbile yake wazi, moja kwa moja anakurudisha tena kwenye zinaa. Huwa nawaambia wanawake mara nyingi sana moyoni mwangu, “why do you always keep reminding us of the things we are struggling to forget?” yaani kwa nini siku zote mnatukumbusha mambo ambayo tunatumia nguvu zote kuyasahau?

Basi tunapoongelea tamaduni za kigeni, tunajikita zaidi katika tamaduni za kimagharibi, hawa watu wanafanya bidii kukifanya kizazi hiki cha sasa kione kuwa zinaa ni jambo la kawaida sana kama kula ugali. Wanaiaminisha jamii kuwa kuzini ni kama kupumua na kila mtu anaweza kuwa anakifanya kitu hicho muda wowote, popote, na anaweza kufanya na yeyote. Mambo haya wanayatangaza kupitia video zao, mziki wao na mambo mengine wanayoyaonesha kwa namna mbalimbali.

Hii ni kazi ya shetani, kwani yeye siku zote anaigeuza kweli kuwa uongo.

Yohana 8:44 Ninyi ni wa baba yenu, Ibilisi, na tamaa za baba yenu ndizo mpendazo kuzitenda. Yeye alikuwa mwuaji tangu mwanzo; wala hakusimama katika kweli, kwa kuwa hamna hiyo kweli ndani yake. Asemapo uongo, husema yaliyo yake mwenyewe; kwa sababu yeye ni mwongo, na baba wa huo.

Tamaduni zetu zinasaidia sana katika kujenga jamii zenye maadili katika maisha. Ambapo suala la zinaa kwa watoto wadogo na vijana linapigwa vita.

Kushindwa kuitawala na kuidhibiti akili

1Wakorintho 15:34

Tumieni akili kama ipasavyo, wala msitende dhambi

Watu wengi hawajui kuwa ili uweze kuepuka dhambi yoyote ile lazima uanze kwanza na akili. Kama akili yako itajikita katika kuwaza tamaa na kutamani, wewe utataenda dhambi tu. Kama akili yako itajikita katika kuutafuta wema na kuwaza mambo yenye maana, basi wewe hauwezi kufanya ujinga. Ndiyo maana Mungu anasema katika

Luka 10:27

Akajibu akasema, Mpende Bwana Mungu wako kwa moyo wako wote, na kwa roho yako yote, na kwa nguvu zako zote,na kwa akili zako zote;

Kama akili zako zitajikita katika kutafakari mambo ya Mungu tu, huwezi kufanya dhambi hata siku moja. Kila baya mtu afanyalo, hulitafakari kwanza na kulifanya akilini mwake kabla hajalifanya katika mwili, au katika uhalisia, yale mambo tuyaonayo mtu anayafanya hadharani, ni matokeo tu ya kinachoendelea akilini mwake. Bwana Yesu asifiwe.

Ikataze akili yako kuwaza zinaa na uzinzi nawe utafanikiwa kujizuia na dhambi hiyo:

Mithali 13:14

Sheria ya mwenye akili ni chemchemi ya uzima, Ili kuepukana na tanzi za mauti.

Ukitafakari na kuwaza mema siku zote, hauwezi kutenda yasiyoendana na mawazo yako. Ina maana akili yako itakuwa imejaa uzima, huo uzima utadhihirika katika matendo yako na utakuwa na matendo yenye tija kwako na kwa jamii yako na kwa Mungu wako. Utakuwa na uwezo wa kupambanua mambo na kuelewa maana ya kila tendo ulifanyalo au kuliwaza:

Mithali 14:8

Akili za mwenye busara ni kujua njia yake; Lakini upumbavu wa wapumbavu ni udanganyifu.

Utatafakari mambo yatakayokuondoa kwenye kawaida na desturi za kibinadamu ambazo zinawaangamiza watu:

Proverbs 15:24

Kwa mtu mwenye akili njia ya uhai huenda juu; Ili atoke katika kuzimu chini.

Tatizo moja kubwa la walokole ni kwamba wakishaokoka wanaacha kutumia maumbile waliyopewa wanamuachia Mungu kila kitu. Anaomba kwa kila jambo kwa sababu tu ameambiwa aombe bila kukoma. Miguu anayo anashindwa kukimbia zinaa, anakemea, matokeo yake anajikuta anaangushwa na shetani.

Kitu cha msingi ni kutumia kila kitu ulichopewa kupigana na shetani, kama unaona hapo ulipo hakuna usalama, kimbia utoke hapo, usianze kukemea wakati unaona haitakusaidia.

Hiyo akili pia uliyopewa, itumie ipasavyo, siyo unategemea maombi tu hata mahali ambapo ungetumia tu akili ungeokoa muda. Mungu alikupa akili ili uitumie, Mungu hamaanishi kuwa ukiokoka usitumie kabisa akili, la sivyo basi angekuwa anawaondolea akili watu pindi tu wanapoongozwa sala ya toba na wanakuwa mapunguani.

Ifundishe akili yako kutenda na kuwaza mema, ikataze kuwaza maovu nawe kamwe hautafanya ujinga. Akili ikiwa na nguvu nyingi utaweza kumtoroka mtu aliyekubananisha chumbani kama alivyofanyiwa Yusufu.

Akili ikiwa na nguvu unaweza kuacha kuzini na mtu hata kama kwa sababu zisizozuilika umelala naye. Akili yako ina nguvu kuliko unavyojua sema tu ni wewe hujaamua kuitumia. Mungu akusaidie kuitumia akili na kuifuata badala ya kufuata tamaa na hisia za mwili.

2Timothy 2:7

Yafahamu sana hayo nisemayo, kwa maana Bwana atakupa akili katika mambo yote.

Dhana potofu

 Kuna watu wameaminishwa kuwa usipofanya mapenzi kwa muda fulani basi unapata matatizo ya uzao au mengine. Jambo hili ni uongo tu unaotumiwa na shetani kuwapoteza watu. Mungu ndiye muumbaji na angejua kuwa suala hili lina madhara asingekukataza.

Lakini wapo pia walioaminishwa kuwa zinaa ndiyo ‘habari ya mjini’ na wanaaminishwa kuwa kama kijana lazima uzini na haiwezekani kuishi bila kuwa na mwenzi ambaye unakuwa unashiriki naye mapenzi. Hizi zote ni dhana potofu kuhusu maisha ya mapenzi na hazifai kuzifuata. Kiuhalisia kitu chochote kile ambacho hakitokani na neno la Mungu siyo cha kweli na haifai kukiamini au kukifuata.

Romans 14:23

Na kila tendo lisilotoka katika imani ni dhambi.

Malezi

Biblia inasema mlee mtoto katika njia impasayo naye hataiacha hata atakapokuwa mzee. Wazazi kutokuwaelekeza watoto njia njema katika maisha yao hupelekea watoto kujaribu na kufanya kila kitu wanachojisikia kufanya au wanachoombwa na wenzao kufanya. 

Lakini pia wazazi wenyewe wanaposhindwa kutumika kama mfano bora kwa watoto inapelekea watoto kuwaiga. Kwa mfano kama baba au mama anajihusisha na vitendo vya ukahaba na kutokuwa mwaminifu katika ndoa, mtoto anaweza kuiga.

Ikumbukwe kuwa mtoto kabla hata hajashawishiwa kufanya uasherati, ipo nguvu ndani yake inayomsukuma kufanya vitu hivyo, sasa wanaomzunguka ndio wanaotakiwa watumie nguvu kumzuia, wasipofanya hivyo ni lazima tu mtoto ataangukia kwenye zinaa.

Usikose kufuatilia sehemu zinazofuata za somo hili. Endelea kubarikiwa na Mungu akuzidishie nguvu za kutenda yale yakupasayo sawasawa na maarifa aliyokupa katika neno lake. Ubarikiwe na Bwana.