OMBA ILI MUNGU AKUPE KUFAHAMU KIWANGO CHA MATOKEO ANAYOTEGEMEA KUTOKA KWAKO

New

NENO LA SOMO: MATHAYO 6:10

“Mapenzi yako yatimizwe, hapa duniani kama huko mbinguni”

Bwana wetu Yesu Kristo asifiwe!!!

Ni kwa neema yake Yesu Kristo tunapata tena nafasi ya kujifunza maandiko matakatifu ambayo ni uzima wetu. Leo nataka tujifunze jambo moja la msingi sana katika ukuaji wetu wa kiroho na katika jitihada zetu za kuhakikisha kuwa tunatimiza kusudi Mungu alilomwekea kila mmoja wetu. Jambo hili ni juu ya ‘kufahamu kiwango cha matokeo ambayo Mungu anayategemea kutoka kwako.’

Tunaposoma Biblia inatufunulia wazi kuwa kila mtu ambaye Mungu amempa neema ya kuzaliwa na kuishi hapa duniani liko kusudi ambalo mtu huyo analibeba na ambalo anapaswa kulitimiza. Kwa mfano, angalia jinsi Bibilia inavyozungumza juu ya Farao, inasema:

Warumi 9:17 Kwa maana maandiko yasema juu ya Farao, ya kwamba, Nilikusimamisha kwa kusudi hili, ili nionyeshe nguvu zangu kwako, jina langu likatangazwe katika nchi yote.

Kwa hiyo Farao japokuwa aliwatesa Israeli na kuwang’ang’ania utumwani kumbe alikuwa amewekwa na Mungu kwa kusudi kwamba Mungu apate kudhihirisha nguvu zake na kwamba jina lake likatangazwe katika nchi yote. Angalia mtu mwingine anayeitwa Bezaleli, Biblia inasema hivi

Bwana akanena na Musa, na kumwambia, Angalia, nimemwita kwa jina lake Bezaleli mwana wa Uri, mwana wa Huri, wa kabila ya Yuda; nami nimemjaza roho ya Mungu, katika hekima, na maarifa, na ujuzi, na mambo ya kazi ya kila aina, ili abuni kazi za ustadi, kuwa fundi wa dhahabu, na wa fedha, na wa shaba, na kukata vito kwa kutiwa mahali, na kuchora miti, na kufanya kazi ya ustadi iwayo yote. (Kutoka 31:1-5)

Hapa tunaona kuwa Mungu alimwita Bezaleli na kumjaza roho yake ili aweze kubuni kazi za ustadi na kuw fundi wa ujenzi wa hema. Inawezekana kabisa kuwa Bezaleli alikuwa hata hajulikani katika kusanyiko, lakini Mungu alikuwa amemwandaa tangu mwanzo kwa ajili ya ujenzi wa hema na wakati ulipofika ikabidi Musa aelezwe juu ya aliyebeba upako wa ujenzi wa hema.

Lengo kwanza la somo hili ni kukufahamisha kuwa kuna kusudi ndani yako na ndani ya kila mtu aliyeko hapa duniani. Inawezekana usijue ni kusudi gani Mungu amekuitia na inawezekana hujaanza hata kulitumikia hilo kusudi lakini hiyo haimaanishi kuwa hakuna kusudi la Mungu ndani yako. Nataka uelewe kuwa gharama ambayo Mungu anaitumia kuhakikisha kuwa unaishi, unakula, unakuwa na afya njema, unafanya kazi zako unafanikiwa, na mengine mengi ni gharama kubwa sana ambayo Mungu hawezi kukubali kuilipa bure kama hakuna sababu ya wewe kuendelea kuwepo duniani. Ndio maana watu wakimaliza kazi waliyopewa na Bwana hapa duniani, Mungu anawaondoa. Matendo 13: 36 inasema

Kwa maana Daudi, akiisha kulitumikia shauri la Mungu katika kizazi chake, alilala, ….

Kwa hiyo kama bado Mungu ameendelea kukuweka hapa duniani jua kuwa bado kuna shauri (kusudi) la Mungu ndani yako ambalo bado linadai litimizwe na ni hilo ndilo linalomfanya Mungu aendelee kukuweka hai.

Sasa lengo langu katika somo hili sio kukuonyesha namna ya kujua kusudi uliloitiwa, HAPANA. Lengo la somo hili ni kutuka kukujulisha kuwa katika kuishi kwako hapa duniani kuna “matokeo” fulani ambayo Mungu anasubiria kuyapata kutoka kwako na matokeo hayo yanakiwango maalumu kilichowekwa na Mungu. Hebu sasa tuliangalie jambo hili kwa undani wake.

Wanafunzi wa Yesu walipoomba wafundishwe kusali, Yesu aliwapa sala maalumu tunayoiita “sala ya Bwana.” Mathayo 6:9-13. Ukiitafakari kwa undani sala hii unagundua kuwa sala hii iliandikwa kwa lengo la kuweka “mbinu za kuomba” ndani ya wanafunzi, na mbinu hizi aliziweka katika mpangilio maalumu. Yale maneno yanayosema “Basi ninyi salini hivi…” yanatupa kujua kuwa alikuwa hawapi agenda za kuomba ila alikuwa anawafundisha “namna” ya kuomba. Sasa katika kuwafundisha namna ya kuomba mbinu ya kwanza ilikuwa ni kumtukuza Mungu na kutambua ukuu wake na ufalme wake katikati ya wanadamu, kama msitari wa 9 unavyosema.

Msitari wa 10 unaweka mbinu ya pili kwa kusema “Mapenzi yako yatimizwe hapa duniani kama huko mbinguni.” Sasa maneno “mapenzi yako yatimizwe” yanatupa kujua kuwa kuna kusudi (purpose) au shauri la Mungu ambalo limewekwa tayari na inabidi litimizwe. Sasa ile amesema kuwa “yatimizwe” inatupa kujua kuwa kuna mtu mwingine hapo kati ambaye anatakiwa kwanza ayajue mapenzi hayo ya Mungu, pili ahakikishe kuwa yanatimia. Ndipo sasa utakuta Biblia ikizungumza hivi kuhusu Yesu:

Yohana 6: 38-40 Kwa kuwa mimi sikushuka kutoka mbinguni ili niyafanye mapenzi yangu, bali mapenzi yake aliyenipeleka. Na mapenzi yake aliyenipeleka ni haya, ya kwamba katika wote alionipa nisimpoteze hata mmoja, bali nimfufue siku ya mwisho. Kwa kuwa mapenzi yake Baba yangu ni haya, ya kwamba kila amtazamaye Mwana na kumwamini yeye, awe na uzima wa milele; nami nitamfufua siku ya mwisho.

Kwa hiyo Yesu alijua wazi kwa nini alishuka hapa duniani. Anasema “sikushuka ili niyafanye mapenzi yangu, bali mapenzi yake aliyenipeleka.” Kwa hiyo kiufupi ni kuwa haikuwa suala ya yeye kuamua kuwa afanye nini hapa duniani, kazi yake ilikuwa ni kuyafahamu mapenzi ya aliyempeleka na kuyatimiza. Na misitari hiyo hapo juu inatueleza kuwa aliyafahamu vema mapenzi ya Mungu. Kwa kujua hilo ndiyo maana Waebrania 10:9-10 inanena juu yake ikisema:

ndipo aliposema, Tazama, nimekuja niyafanye mapenzi yako. Aondoa la kwanza, ili kusudi alisimamishe la pili. Katika mapenzi hayo mmepata utakaso, kwa kutolewa mwili wa Yesu Kristo mara moja tu.

Sasa ukirudi katika ile sala ya Bwana utagundua kuwa aliposema “mapenzi yako yatimizwe” aliweka pia na mahali yanapotakiwa kutimizwa, yaani “hapa duniani.” Kwa hiyo tunafahamu sasa wazi kuwa kuna mapenzi ya Mungu au kusudi la Mungu ambalo Mungu anataka limitizwe na mahali yanapotakiwa kutimizwa ni duniani.

Sasa wacha nikwambie siri moja kuhusu jambo hili. Mungu ni Roho (Yohana 4:24) na dunia asili yake ni mwili. Sasa  vitu vya rohoni haviwezi kufanya kazi katika ulimwengu wa mwili isipokuwa vimepata umbo la mwili. Ndiyo maana haikuwezekana Yesu kuja katika umbo la rohoni bali alitwaa mwili akakaa kwetu tukauona utukufu wa Mungu. Kwa hiyo sasa Mungu anapotaka kutimiza mapenzi yake katika ulimwengu wa mwili anatafuta mtu katika dunia ili ampe kusudi hilo. Ndiyo maana sasa ule msitari wa Mathayo 6:10 unasema “mapenzi yako yatimizwe hapa duniani.”

Sasa huyu mtu aliyeko duniani ni lazima aelewe kuwa kuwepo kwake duniani kunatokana na heshima ambayo Mungu amempa na kumchagua ili atimize kusudi la Mungu. Si uamuzi wa huyu mtu kuishi anavyotaka au kufanya chochote anachotaka. Ndiyo maana hata licha ya Adamu kuishi hapo kwanza katika dunia ambayo haikuwa na dhambi bado Mungu alimwekea masharti ya namna ya kuishi na nini cha kufanya. Mtu anapoanza kutaka kuishi kivyake mbali na kusudi alilowekewa na Bwana hapo ndipo anapoanza kujitenga na Baraka za Mungu na kujikuta akitumbukia katika dhambi.

Ndipo hapo sasa utakuta Waefeso 5:17 ikitusisitiza ikisema: “Kwa sababu hiyo msiwe wajinga, bali mfahamu ni nini yaliyo mapenzi ya Bwana.” Kwa hiyo kufahamu nini mapenzi ya Mungu kwako ni jambo la muhimu sana, na Mungu mwenyewe anatualika tumwombe ili tufahamu mapenzi yake maishani mwetu. Isaya 45:11 inasema:

Bwana, Mtakatifu wa Israeli, na Muumba wake, asema hivi; Niulize habari za mambo yatakayokuja; mambo ya wana wangu, na habari ya kazi ya mikono yangu; haya! Niagizeni.

Kwa hiyo ni muhimu sana kuweka utaritibu wa kumuuliza Mungu kuhusu mapenzi yake katika maisha yako. Utaratibu huu unakusaidia sana namna unavyopeleka maombi yako mbele za Mungu ili usije ukaomba kinyume na kusudi la Bwana. 1 Yohana 5:14-15 inatuambia hivi:

Na huu ndio ujasiri tulio nao kwake, ya kuwa, tukiomba kitu sawasawa na mapenzi yake, atusikia. Na kama tukijua kwamba atusikia, tuombacho chote, twajua kwamba tunazo zile haja tulizomwomba.

Kwa hiyo kuna kuomba kitu sawa na mapenzi ya Mungu lakini pia kuna kuomba kinyume na mapenzi ya Mungu. Ili maombi yako yasikiwe na Mungu basi ni lazima yabebe mapenzi ya Mungu ndani yake na si mapenzi ya anayeomba. Ndio maana Yesu alipotaka kuomba msalaba umwepuke alikumbuka kuwa hayo hayakuwa mapenzi ya Mungu na hivo akaruhusu Mungu atimize yake.

Sasa ukiishajua mapenzi ya Mungu kwako kinachofuatia ni kuyatimiza na Mungu ndiye anayeweka kiwango cha namna ya kuyatimiza. Sasa katika kuyatimiza mapenzi ya Mungu kuna mambo matatu nataka tuyaangalie.

1.   Mapenzi ya Mungu yanabebwa katika nyakati maalumu ambazo Mungu mwenyewe ameziamuru

Muhubiri 3:1 inasema “Kwa kila jambo kuna majira yake, Na wakati kwa kila kusudi chini ya mbingu.” Kwa hiyo Mungu amepangilia kila jambo kwa kufuata majira yake na kila kusudi la Mungu chini ya mbingu lina wakati wake wa kutimizwa. Sasa mtu asipojua majira na nyakati ambazo Mungu ameziamuru juu ya maisha yake anaweza akapishana sana na Baraka za Mungu. Hii ni kwa sababu muda (nyakati na majira) ndio unaoamua nini kiachiliwe kwako. Sasa ukidai Mungu akupe kitu fulani yeye anaangalia kwanza nyakati hizo zimebeba nini cha kwako. Ndio maana alimwambia Habakuki aingojee njozi hata wakati wake ulioamriwa utakapotimia.

Habakuki 2:2-3 Bwana akanijibu, akasema, Iandike njozi ukaifanye iwe wazi sana katika vibao, ili aisomaye apate kuisoma kama maji. Maana njozi hii bado ni kwa wakati ulioamriwa, inafanya haraka ili kuufikilia mwisho wake, wala haitasema uongo; ijapokawia, ingojee; kwa kuwa haina budi kuja, haitakawia.

Kwa hiyo japokuwa Habakuki alipewa kuona maono ya jambo alilokuwa analalamikia bado jambo hilo halikutokea hapo hapo kwa sababu wakati wake ulikuwa bado. Watu wengi (hasa vijana) tunakosea sana katika uhusiano wetu na Mungu kwa sababu ya kushindwa kuelewa ni muda gani umebeba kusudi gani.

Unaposhindwa kuelewa kusudi lililopo kwenye muda fulani basi uwe na hakika kuwa mapenzi ya Mungu yaliyokusudiwa kwenye muda huo hayatatimia. Ukishindwa kuelewa kwa nini Mungu amekuweka sehemu fulani kwa muda huo ni ngumu sana kuona fursa za kufanikiwa zilizofichwa kwenye huo muda. Kitabu cha Waefeso 5:16 kinasema “mkiukomboa wakati kwa maana zamani hizi ni za uovu.” Msitari huu kwenye tafsiri ya kiingereza ya New International Version (NIV) inasema:

“…making the most of every opportunity, because the days are evil.”

Kwa hiyo Paulo aliposema “mkiukomboa wakati” alitaka tuelewe kuwa muda ni fursa. Muda ni fursa ambayo Mungu amempa kila mtu ili aweze kuleta matokeo fulani. Sasa mtu asipoelewa kwa nini yupo mahali fulani kwenye muda fulani hawezi kuona fursa ambazo muda huo unampa na hivyo hakuna matokeo yoyote atakayovuna.

Jambo la kujua ni kuwa kwenye kila muda Mungu anaokupa hapa duniani kuna kusudi aliloweka ndani ya huo muda na kuna matokeo anayotarajia kuyaona yakizalishwa na mtu husika kwenye muda huo, ndio maana Paulo alitaka tuenende kwa hekima pale inapokuja suala la muda kwa sababu ni fursa ambayo Mungu anakupa ili ulete matokeo fulani.

Hebu ngoja tuuangalie mfano huu aliotoa Bwana Yesu katika Luka 13:6-9

Akanena mfano huu; Mtu mmoja alikuwa na mtini umepandwa katika shamba lake la mizabibu; akaenda akitafuta matunda juu yake, asipate. Akamwambia mtunzaji wa shamba la mizabibu, Tazama, miaka mitatu hii naja nikitafuta matunda juu ya mtini huu, nisipate kitu; uukate, mbona hata nchi unaiharibu? Akajibu akamwambia, Bwana, uuache mwaka huu nao, hata niupalilie, niutilie samadi; nao ukizaa matunda baadaye, vema! La, usipozaa, ndipo uukate.

Hebu chunguza kwa makini hoja ya huyu mtunzaji wa mtini; anasema ‘miaka mitatu hii naja nikitafuta matunda nisipate.” Hoja ya juu ya kutaka kuukata mtini huu haikutokana na kutokuzaa tu bali ilitokana na kutokuzaa ndani ya muda ilitegemewa kuzaa. Ndio maana nakwambia kuwa kwenye kila muda uliopewa yapo matokeo au matunda ambayo Mungu anatarajia uyazae. Sasa ni kazi yako kuchunguza kama unazaa au umedumaa.

2.   Mapenzi ya Mungu yanatimizwa kwa kufuata viwango alivyoweka Mungu mwenyewe

Sasa turudi kwenye Mathayo 6:10 inasema “Mapenzi yako yatimizwe hapa duniani kama huko mbinguni.” Yesu alikua anatufundisha jambo la ajabu sana katika msitari huu. Anasema mapenzi ya Mungu yanapaswa kutimizwa hapa duniani kama yanavyotimizwa mbinguni. Hili ni jambo zito kidogo. Ni nini maana ya kusema “kama yanavyotimizwa mbinguni?”

Maana yake ni kuwa mbingu zinapoachilia kusudi ndani ya mtu huwa pia zinaachilia na kiwango cha matokeo yanayotegemewa. Sasa kiwango hicho huwa si kwa mujibu wa anayetimiza kusudi bali kwa mujibu wa aliyetoa kusudi. Okay!! Wacha niseme hivi ukienda kwenye kiwanda cha kutengeneza magari utakuta kuna watu wanaofanya kazi ya designing na wengine wanafanya kazi ya kutengeneza. Sasa yule designer ndiye mwenye kubeba kusudi (picha ya gari inayotakiwa kutokea) na yule mtengenezaji ni mtimiza kusudi. Sasa huyu mtengenezaji anatakiwa kutengeneza gari kwa kufuata mapenzi ya designer na kama akifanya tofauti na hapo kazi inakua imeharibika.

Sasa Mungu ndiye designer wa maisha ya kila mtu na ndiye anayebeba kusudi la kila mmoja wetu na mtu ndiye mtimiza kusudi. Sasa ni kazi ya huyu mtu kujua ni aina gani ya kusudi lipo moyoni mwa designer (Mungu) ili aweze kulitimiza. Asipofanya hivo kazi inakua imeharibika.

Kwa hiyo tunatakiwa kutimiza kusudi la Mungu hapa duniani “kama linavyotimizwa huko mbinguni.” Maana yake lazima ujiulize mbingu zinataka uzalishe kitu gani? Mungu anataka aone matunda gani kutoka kwako? Matunda hayo yanatakiwa kuzaliwa katika muda gani? Haya ni mambo ya msingi sana kuyajua kwa sababu yana nafasi kubwa sana katika kupima kazi yako hapa duniani.

Angalia Ufunuo 22:12 Yesu anavyosema: “Tazama, naja upesi, na ujira wangu u pamoja nami, kumlipa kila mtu kama kazi yake ilivyo.” Kwa hiyo kila mtu ana kazi yake na kila mtu atalipwa ujira wake kwa kadiri alivyotimiza kazi aliyopewa.

Kwa hiyo kila mtu ameajiriwa na Mungu kwenye kazi maalumu. Unaweza ukasema kivipi. Hebu angalia hii Ayubu 14: 1-6, msitari wa 5 na 6 unasema:

Kwa kuwa siku zake zimeamriwa, hesabu ya miezi yake unayo wewe, Nawe umemwekea mipaka yake asiyoweza kuipita; Acha kumwangalia yeye, apate kupumzika, Hata atakapoitimiza siku yake, kama aliyeajiriwa.

Ayubu anamtaka kila mtu aitimize siku yake kama mtu aliyeajiriwa. Kwa hiyo Mungu ametuajiri katika kazi inayoitwa kutimiza kusudi ndani ya muda tuliopewa na tunatakiwa kutimiza hilo kwa kufuata viwango vya matokeo Mungu anayotazamia tuyapate.

Itaendelea